>>Angalia ukurasa huu kwa lugha ya kiingereza

Roho Mtakatifu ambaye analihuisha Kanisa ameliwezesha Kanisa hilo kuanzia wakati wa Pentekoste, kuenea katika mabara yote na kwa watu wa tamaduni mbalimbali, na wanaozungumza lugha mbalimbali. Kila mahali Ukatoliki wa Kanisa unawekwa bayana na Waamini Wakristo ambao wanaeleza imani yao katika lugha mbalimbali.

Kanisa Katoliki Vienna linadhihirisha upeo wa Kanisa kutokana na makundi mbalimbali ya waamini yakiwa yameunganika na Askofu mahalia. Jumuiya ya Waafrika Wakatoliki wazungumzao Kiswahili ni moja kati ya makundi hayo. Kwa sasa hii ni jumuiya changa kuliko zingine zote. Kwa ujumla, lugha ya Kiswahili inazungumzwa katika eneo la Afrika Masharika kama vile Kenya, Tanzania na Uganda. Nchi nyingine wa Kiafrika ambako lugha ya Kiswahili huzungumzwa ni katika sehemu ya Rwanda na Burundi na katika Jamhuri ya Watu wa Kongo.
Ingawa wazo la kuanzishwa Jumuiya hii lina mzizi wake tangu miaka ya 1990, lilibaki katika mawazo bila kutekelezwa. Jumuiya wa Waafrika Wakatoliki wanaozungumza Kiswahili, ilianza rasmi tarehe 25 Aprili 2010. Siku hii, Jumuiya hii ilizinduliwa kwa kuadhimisha Misa Takatifu iliyohudhuriwa na Waumini kumi na Sita pamoja na Mapadri watano (John Njenga, Castor Goliama, David Malel, Jordan Nyenyembe, Michael Mwambegu). Tangu kuanzishwa kwake hadi sasa jumuiya hiyo inaongozwa na Padri Michael Kenga Mwambegu (kutoka Jimbo Kuu la Mombasa-Kenya); akishirikiana na mapadri wenzake watatu kutoka Kenya, na watano kutoka Tanzania- Richard Kimbwi; Leopold Mlimbo; Joseph Chinguile; Sammy Kiprugut. Tangu kuanzishwa kwake, wanajumuiya hukutana kuadhimisha Ekaristi Takatifu katika kila Dominika ya mwisho ya mwezi, aidha mipango ipo mbioni kukutana Dominika mbili kwa mwezi.

Jumuiya wa Waafrika Wakatoliki wanaozungumza Kiswahili imewekwa chini ya Usimamizi wa Mtakatifu Yosefina Bakhita. Hivi sasa imekaribishwa katika Parokia ya Mtakatifu Birgita. Parokia hiyo ina mahusiano ya muda mrefu na mapadri kutoka Kenya. Mahusiano hayo yalijengwa kati yao na aliyekuwa Paroko wa Parokia hiyo Pd. Leopold Kaupeny, yalizaa urafiki ambao umewezesha Jumuiya hii kukaribishwa kufanya huduma ya kiroho hapo. Hata Paroko wa sasa anaendeleza moyo huo huo wa kirafiki. Baraza la Waamini la Parokia, limeipokea Jumuiya hii kwa moyo mkunjufu, na liko tayari kuitia shime katika utume wake. 

Kama ilivyo ada kwa Jumuiya ya Kikatoliki, inaendesha huduma zake kwa ushirikiano na uongozi wa Kanisa mahalia. Katika mwanga huo, Jimbo Kuu la Vienna limekabidhi Jumuiya hii chini ya Gombera (Rektori) wa ARGE, ambaye anasimamia Jumuiya za Wakatoliki kutoka Afrika, Asia na Amerika ya Kusini. Askofu Msaidizi Francis Scharl ndiye anayehusika na Jumuiya za kigeni katika Jimbo la Vienna, naye yupo pamoja nasi bega kwa bega.